திருநெடுங்களம்

திருநெடுங்களம் என்பது திருச்சிக்கு அருகில் உள்ள ஒரு சிவஸ்தலம்.சமீபத்தில் கும்பாபிஷேகம் நடந்து முடிந்தது.பலநூற்றாண்டு பழமை வாய்ந்த கோவில் என பத்திரிகைகளில் கும்பாபிஷேகத்தின்போது பெட்டி செய்திகள் வந்தது.அப்போதிருந்து செல்லவேண்டும் என்பது ஆசை.சென்றவாரம் தான் வாய்ப்பு கிடைத்தது, திருச்சிக்கு அருகில் என சொல்வதைவிட தஞ்சைக்கு அருகில் என சொல்லலாம்.திருச்சியிலிருந்து டூவீலரில் சென்றால் போகிறது போகிறது ....போய்க்கொண்டே இருக்கிறது.துவாகுடி சென்று அங்கிருந்து இடப்புறம் பிரியும் சாலையில் 4கி.மீ தொலைவில் இருக்கிறது.அங்கங்கு அறிவிப்புப் பலகை வைத்து வழிகாட்டியுள்ளனர்.

இடர்களையும் ஈசன் இவர் என்பதால் பிரார்த்தனை,ப்ரீதி க்கு என மக்கள் இங்கு வந்து போகிறார்கள்.கோவிலுக்கு வெளிப்புறம் ஒருபக்கம் விநாயகர் மறுபக்கம் கருப்பண்ணசாமி இவர் ரொம்ப சக்தி வாய்ந்தவர் எனவும் வேண்டும் வரம் தருபவர் எனவும் கூறுகின்றனர்.ஆலயத்தின் எதிரேயுள்ள சுந்தர தீர்த்தக்கரை.கருப்பண்ணசாமிக்கு  ஞாயிறு, வெள்ளி, செவ்வாய் முதலிய நாட்களில் பானகம் படைத்து வழிபட்டால் நாள்பட்ட நோய்களும் குணமாகி நிவாரணம் அளிக்கும் எனச்சொல்கின்றனர்.

சமீபத்தில் தான் கும்பாபிஷேகம் முடிந்ந்திருந்ததால் கோபுரம் பெய்ண்ட் அடிக்கப்பட்டு வண்ணமயமாக மிளிர்கிறது. ஞானசம்பந்தர் இக்கோவில் உறையும் ஈசனைப் பற்றி 10பதிகங்கள் பாடியுள்ளார்.ஒரு ஆச்சரியம் என்னவெனில் அவர் பாடிய பத்துப்பதிகத்தில் உள்ள புராணக் காட்சிகள் அனைத்தும் கோபுரத்ஹ்டில் சுதைவடிவில் இருக்கிறது.இவர் பாடியதை வைத்து கோபுரம் கட்டினார்களா அல்லது கோபுரத்தைப் பார்த்து இவர் பாடினாரா என்பது வரலாற்று ஆசிரியர்கள் தான் முடிவு செய்ய வேண்டும்.

இக்கோபுரத்தில் உள்ள ஒரு சுதை

இது ஈசனின் வடிவம்.சிவ பெருமானின் வீரத்தினை விளக்கும் எட்டு வடிவங்களில் ஒன்று.ஓவியர் சில்பி அவர்களின் அற்புதமான ஓவியம் ஒன்று உண்டு.திருவண்ணாமலை வடக்கு வாசல் கோபுரத்தின் உள்ளே மேல் விதானத்தில் இந்த சிற்பத்தை காணலாம்.ஆனால் கீழே உள்ள படம் திரு நெடுங்குளம் கோவில் கோபுரத்தில் உள்ளது..போன மாதம் தான் குடமுழுக்கு நடந்துள்ளது.புதிதாக வண்ணம் தீட்டப் பட்டுள்ளது.இதில் ஒரு சந்தேகமும் உள்ளது இதுவரை நான் பார்த்த இதுதொடர்பான ஒவியம்ங்கள் மற்றும் சிலை இவைகளில் ஈசன் காலடியில் யானைத்தலை இருக்கும் யானையின் தோலை உறித்து இரு கைகளாலும் தூக்கி பிடித்தபடி இருப்பார் சிவன்.யானையின் கால்கள் மேல்பக்கம் இரண்டு இருக்கும்.வெளியில் தெரிவது தோலின் உள்பகுதியா? அல்லது வெளிப்பகுதியா? எது நமக்குத் தெரிவது.இதுவரை நான் பார்த்திருந்தது மேல் தோலே (கருப்பு) நமக்குத் தெரியும் இந்தச் சுதையில் யானையின் உள்தோல் (இரத்த நிறத்தில்) அழகாக காட்டப்பட்டுள்ளது.இது அக் காட்சியின் கொடூரத்தை கண்முன்னே கொண்டு வருகிறது.

“வாயே வாழ்த்து கண்டாய் மத யானை உரிபோர்த்துப்

பேய்வாழ் காட்டகத்து ஆடும் பிரான் தன்னை

வாயே வாழ்த்து கண்டாய்” ( திருநாவுக்கரசர் )

இது தொடர்பாக இரண்டு புராணக்கதைகள் இருப்பது சுவாரசியமானது.http://www.manivasagar.com/art_c_Yanaithoolannal.html

இங்குள்ள ஒரு கல்வெட்டு கல்வெட்டு உள்ள இடம்: சோமாஸ்கந்தர் திருமுன் வாயில் உத்திரம்.

1) ஸ்வஸ்திஸ்ர் குலோத்துங்க சோழ தேவற்கு யாண்டு 12ஆவது இத்திருமண்டபஞ் செய்வித்தான் பாண்டி கு

2) லாசநி வ[ள நாட்டு] கிளியூர் நாட்டுக் கள்ளிக்குடி அரைய மகந் ஆதித்தந் உலகநான விசையாலய முத்தரை[யன்].

கல்வெட்டுச் செய்தி: சோமாஸ்கந்தர் திருமுன்னுக்கு முன்னாலுள்ள மண்டபத்தை முதலாம் குலோத்துங்கனின் பன்னிரண்டாம் ஆட்சியாண்டில் ஆதித்தன் உலகனான விசயாலய முத்தரையன் என்பார் எடுப்பித்திருக்கிறார். இவரது தந்தையார் பெயர் அரையன். ஊர் கிளியூர் நாட்டுக் கள்ளிக்குடி. 

நாங்கள் போனபோது கோபுர வாசலில் ஒரு பெரியவர் காலில் கட்டு போட்டு இருந்தார்.யாசகம் கேட்டார்.கொஞ்சம் பேச்சுக் கொடுத்தவுடன் அவரே கைடாக மாறி கோவிலின் பலபகுதிகளுக்கு அழைத்துச் சென்று சில தகவல் களைச் சொன்னர்.

இந்தக் கோவில் இரண்டு விமானங்கள் இருப்பது ரொம்ப விசேஷம்.

காரணம்சிவபெருமான் உமையவளுக்கு தனது திருமேனியின் இடப்பாகத்தில் இடம் கொடுத்ததால், இத்தலத்தின் கருவறையில் ஈசன் சிவலிங்க வடிவமாக இருந்தாலும், அரூப வடிவில் பார்வதியும் உடன் இருப்பதாக ஐதீகம். இதனால் கருவறையின் மேல் இரண்டு விமானங்கள் உள்ளன.  கருவறை இரட்டை விமான அமைப்பு, அப்படியே காசி விஸ்வநாதர் கோவில் இரட்டை விமான அமைப்பை ஒத்துள்ளது எனக் கூறுகிறார்கள்.அம்பாள் சன்னதியில் விமானம் இல்லை என்பதையும் பார்க்க முடிகிறது.

தட்சிணாமூர்த்தி யோகத்தில் இருக்கிறார்.பூணலை தனது முட்டியில் மாட்டியவாறு யோக நிஷ்டையில் இருக்கிறார்.அவ்வளவு அழகான சிற்பம்.நேரில் பார்ப்பது போல் இருக்கிறது.

இங்குள்ள வராகிக்கு விரளி மஞ்சள் இடித்து இராகு காலத்தில் ஞாயிறு, வெள்ளி நாட்களில் அபிஷேகம் செய்து வழிபாடு செய்வதால், தடை பட்டு வரும் திருமணங்கள் விரைவில் நடக்கின்றன.இந்த உரலை நீங்கள் அவசியம் பார்த்து ரசிக்க வேண்டும் கலைநுனுக்கத்துடன் செய்யப்படுள்ள கல் உரல்.

இங்குள்ள சிவனுக்கு மாதுளம்பழம் அபிஷேகம் செய்வதால் நினைத்த காரியம் நடக்கும் என்பது ஐதீகம்.திருநெடுங்களநாதருக்கு மாதுளம் பழ முத்துக்களால் நண்பகலில் அபிஷேகம் செய்து வழிபட்டால் நினைத்த காரியம் கைகூடும். அதுவும் வெள்ளை நிற மாதுளம் பழங்களால் அபிஷேகம் செய்வது பன்மடங்கு பலன்களை பெற்றுத்தரும். திருமணம் நிறைவேறுதல், கணவன்–மனைவி ஒற்றுமை, செல்வ வளம், வீடு, நிலம் வாங்க என யாவற்றிற்கும் மக்கள் இந்த மாதுளம் பழ அபிஷேகத்தால் தீர்வு காண்கிறார்கள் இப்பகுதி மக்கள். அடுத்தமுறை வரும்போது இரண்டு மாதுளம்பழம் வாங்கி வரும்படி பெரியவர் சொன்னார்.

இறைவர் திருப்பெயர் : நித்யசுந்தரேஸ்வரர், நெடுங்களநாதர்.

இறைவியார் திருப்பெயர்: மங்களநாயகி, ஒப்பிலா நாயகி.

தல மரம்: வில்வம்.

தீர்த்தம்: அகத்திய தீர்த்தம், சுந்தர தீர்த்தம்.

வழிபட்டோர் : அகத்தியர்.

தேவாரப் பாடல்கள்: சம்பந்தர் - மறையுடையாய் தோலுடையாய்

துன்பமின்றி இந்த உலகில் அனுதினமும் இன்பமாக வாழ ‘திருநெடுங்களம்’ ஈசன் நமக்கு திருவருள் புரிகிறார் என திருநெடுங்களம் பதிகத்தின் ஒவ்வொரு பாடலின் நிறைவிலும் திருஞானசம்பந்தர் ‘இடர்களையாய் நெடுங்களம் மேயவனே’ என வரிக்கு வரி உறுதியுடன் கூறி இருப்பது குறிப்பிடத்தக்கது.

இந்த திருக்கோவிலின் வெளிப்புற மதிலை தாண்டினால் கிழக்கு நோக்கிய ஐந்து நிலை ராஜ கோபுரத்தை தரிசனம் செய்யலாம். அடுத்தாற்போல் கொடிமரம், பலிபீடம் ஆகியவை உள்ளது. இதனை வழிபட்டு வெளிப்பிரகார வலம் வரவேண்டும். அப்போது வடகிழக்கு மூலையில் திருக்கல்யாண மண்டபமும், அம்பாள் சன்னிதியும் உள்ளது. வெளிப்பிரகாரத்தின் வடக்கில் அகத்தியர் சன்னிதியும், எதிரே என்றும் வற்றாத அகத்தியர் தீர்த்தமும் இருக்கிறது.

அகத்தியர் வழிபட்டு பேறு பெற்ற தலம் இதுவாகும். வந்திய சோழ மன்னனுக்கு ஈசன் பேரழகுடன் காட்சி கொடுத்த காரணத்தால், இத்தல இறைவன் ‘நித்திய சுந்தரேஸ்வரர்’ என்றும் அழைக்கப்படுகிறார். இத்தல ஈசனை தொடர்ந்து 6 வெள்ளிக்கிழமைகளில் நெய்தீபம் ஏற்றி வழிபட்டு வந்தால் முகப்பொலிவு கூடும். சகல ஜனவசியம் ஏற்படும் என்று கூறப்படுகிறது.

. 

சுவாரசியமான விஷயம்

பின்பகுதியில் உள்ள மண்டபத்தில் சிதில மடைந்த சிலைகள் சில உள்ளன.அதில் ஒன்று தான் மேலே உள்ள பெருமாள் சிலை.சங்கு சக்கரம் இரண்டுபக்கமும்.சக்கரம் பாதி உடைந்துள்ளது.இது எங்கிருந்து எடுக்கப்பட்ட சிலை என்று தெரியவில்லை.சைவ வைணவப் பூசல்களால் இங்கு வந்ததா எனவும் தெரிய்வில்லை.அழகான சிலை.

இத்தலத்தில் உள்ள வெண்கலக் குதிரையை தூக்கும் ஆண்களையே அந்த காலத்தில் இச்சுற்று வட்டார பெண்கள் தங்கள் கணவராக தேர்ந்தெடுத்துள்ளனர்.

மூலஸ்தானத்தை சுற்றிவரும் போது பல கல்வெட்டுக்களை காணமுடிகிறது.

                                                     இரண்டு விமானங்கள்

ஸ்ரீரங்கம் சேர்த்தி 2014

ஸ்ரீரங்கத்தில் சேர்த்தி நேற்று. ஒவ்வொரு பங்குனி உத்திரத்தன்றும் தாயாரும் நம்பெருமாளும் சேர்ந்து தாயார் சன்னதி சரணாகதி மண்டபத்தில் சேர்ந்து சேவை சாதிப்பதற்கு சேர்த்தி என்று பெயர்.ஸ்ரீரெங்கநாதர் உறையூரில் எழுந்தருளி சேர்த்தி சேவை சாதித்த நிகழ்ச்சி 16ம் தேதி நடந்தது.உறையூர் கமலவல்லி நாச்சியாருடன் சேர்ந்து இருந்த திருக்கோலத்தை 16.4.2014 அன்று இரவு உறையூரில் கண்டு ஆனந்தித்தோம்.அன்றைய தினம் கோவில் வெளிபிரகார மண்டபத்தில் நடைபெறும் மேளக்கச்சேரி அதிஅற்புதமாக இருக்கும்.(ஸ்பீக்கரை கொஞ்சம் குறைக்க வேண்டும்).பங்குனி திருவிழாவின் முக்கிய நிகழ்ச்சியான சேர்த்தி சேவை நேற்று நடந்தது. அன்றைய தினம் காலை ஆறு மணிக்கு கண்ணாடி அறையில் இருந்து ஸ்ரீரெங்கநாதர் தங்க பல்லக்கத்தில் இருந்து புறப்படுவார். சித்திரை வீதிகள், உத்திர வீதிகளில் வலம் வந்து திருச்சுற்று வழியாக காலை 9.30 மணிக்கு ஸ்ரீ தாயார் சன்னதியை அடைவார்.இதன் பிறகு பிரணய கலகம் என்றழைக்கப்படும் மட்டையடி நிகழ்ச்சி நடக்கிறது. ஸ்ரீரெங்கநாதர் தான் அணிந்து இருந்த மோதிரத்தை உறையூர் நாச்சியாருக்கு அன்பளிப்பாக கொடுத்து இருப்பார். அவ்வாறு கொடுத்து விட்டு ஸ்ரீரங்கம் கோவிலில் எழுந்தருளியுள்ள ஸ்ரீதாயாரிடம் வரும்போது மோதிரம் எங்கே? என்று ஸ்ரீரெங்கநாதரிடம் சண்டையிட்டு அவரை மட்டையால் தாக்கும் நிகழ்ச்சி நடித்து காட்டப்படும். தாயார் சந்தியிலிருந்து வேகமாக வாழைமட்டைகள்  அரங்கன் பல்லக்குமீது வீசிவர உடனே நம்பெருமாள் பல்லக்கை மூடிக்கொண்டு பயந்தமாதிரி பின்னோக்கி நகர...இந்த வேடிக்கை விளையாட்டு ஊடல் காட்சிகள் கண்ணுக்கு ரம்மியமானவை இந்த வினோதமான நிகழ்ச்சியை காண ஆயிரக்கணக்கான பொதுமக்கள் ஸ்ரீதாயார் சன்னதிக்கு வருவார்கள். சமாதானமடைந்த ஸ்ரீதாயார் ஸ்ரீரெங்கநாதரை மண்டபத்தில் அனுமதிப்பார் . அதன் பிறகு ஏகாந்தம்.பகல் இரண்டு மணிக்கு பங்குனி உத்திர மண்டபத்தை அடைவார். இரவு 10.30 மணி வரை ஸ்ரீதாயாருடன் சேர்த்தி சேவை சாதிக்கிறார்.வருடத்தில் பங்குனி உத்திரம் அன்று ஸ்ரீதாயார் ஸ்ரீரெங்கநாதர் சேர்ந்திருப்பர். அன்றையதினம் வழிபட்டால் குடும்பத்தில் ஒற்றுமை ஓங்கும். வேண்டுவன கிடைக்கும். திருமண பாக்கியம் கிட்டும் என்பது ஐதீகம். கடந்த சில ஆண்டுகளாக இந்த சேர்த்தி வைபவத்தை காணும் பாக்கியம் பெருமாள் அருளால் கிடைத்து வருகிறது.இலவச சேவை, 50.00 ரூ சேவை மற்றும் ரூ.250 கியூ.மாலை 4.00 மணிக்கு நானும் ஜயந்தியும் கியூவில் நின்றோம் ஒருமணிநேரத்தில் சேவையாயிற்று.தாயார் எப்போதும் நம்பெருமாளுடன் சேர்ந்து இருக்கும் நாளில் மிகுந்த பூரிப்புடன் இருப்பார்.வாராவாரம் சனிக்கிழமை சேவிக்கும் தாயாருக்கும் இன்றைய தாயாருக்கும் இருக்கும் வித்தியாசம் உணரமட்டுமே முடியும்.இந்த முறை நெருக்கடி இல்லை.பிடித்துத் தள்ளுவது இல்லை. சேவை முடித்து வசந்த மண்டபம் வழியாக நந்தவனம்...சக்கரத்தாழ்வார் சன்னதி...வழியாக வெளியேறினோம்.நந்த வனப்பகுதியில் சுடச் சுட பானையில் அக்கார அடிசில்....விறகடுப்பு வாசனையுடன் ...ஆளுக்கு ஒரு கப் சாப்பிட்டோம்..

             அக்கார அடிசில் (அக்காரவடிசில்) விற்பனை பானையிலிருந்து

                   நந்தவனப் பகுதியில் பிரசாதத்தை பகிர்ந்து கொள்ளும் குடும்பம்.

அகத்திலிருந்து பறித்துச் சென்ற மனோரஞ்சிதப் பூக்களை நம்பெருமாள் பாதத்தில் பட்டர் சேர்த்தார்.மனமும் கண்களும் நிறைந்தது.உடலில் இளமை யும் தெம்பும் இருக்கும் போதே இவைகளைக் காணும் பாக்கியம் கிடைக்க வேண்டும்.

” கிளரொளி இளமை கெடுவதன் முன்னம்
வளரொளி மாயோன் மருவிய கோயில்
வளரிளம் பொழில்சூழ் மாலிருஞ்சோலை
தளர்விளராகில் சார்வது சதிரே. ” ((திருவாய்மொழி – 2.10.1) )

ஆனால் முதியவர்கள் எத்தனையோபேர் இந்த வைபவத்தை காண தள்ளாத வயதிலும் வருகிறார்கள் என்பதை காண முடிகிறது.அவரகளை உடன் இருந்து பொறுமையாக அழைத்துச் செல்லும் இளயவர்களை காணும்போது வாயாரவாழ்த்தத் தோன்றுகிறது.நான் பார்த்த ஒரு முதிய தள்ளாத, ஊன்றுகோல் துணையின்றி நடக்க இயலாத ஒரு பாட்டியை 22 வயது மதிக்கத் தக்க பேரன் உடனிருந்து பொறுமையாக அழைத்துச் சென்ற காட்சியை காண முடிந்தது.

                                   தள்ளாத வயதிலும் சேர்த்தி காண வந்த பாட்டி

                        உடனிருந்து பொருமையாக அழைத்துச் செல்லும் பேரன்

துறையூர் பெருமாள் மலை

துறையூர் என்றவுடன் எனக்கு ஞாபகம் வருவது சித்தப்பா, கு.ப.ரா,தி.ஜா, வல்லிக் கண்ணன், ஆகியோர்தான். நான் முதன் முதலில் சித்தப்பாவுடன் தான் துறையூர் வழியாக முசிறி வந்து கரூர் சென்றேன்.திருலோகசீத்தாராம் அவர்களின் கிராம ஊழியன் பத்திரிகை துறையூரிலிருந்து தான் வந்து கொண்டிருந்தது. அதன் ஆசிரியராக கு.ப.ரா இருந்துளார், அவருக்கு பிறகு வல்லிக்கண்ணன் ஆசிரியராக இருந்துள்ளார்.சரி அதற்கின்ன என்கிறீர்களா?

துறையூர் பெருமாள் மலையில் ஸ்ரீதேவி, பூதேவி சமேத ஸ்ரீபிரசன்ன வெங்கடாஜலபதி சுவாமி சேவை சாதிக்க அடியேனுக்கு நேற்று வாய்த்தது.துறையூருக்கு அருகில் ( பெரம்பலூர் செல்லும் சாலையில்) இருக்கும் இம்மலையில் பேரழகுடன் கோவில் கொண்டுள்ள பெருமாள்.1554 மலைப் படிக்கட்டுகள்.வாகனங்கள் செல்ல 5 கி.மீ சுற்று வழிப்பாதை . கடந்த 25 வருடங்களுக்கு முன் தாத்தையங்கார் பேட்டையை சேர்ந்த ஒரு கப்பல் வணிகர் தனது சொந்த முயற்சியால் இந்தப் பாதையை அமத்ததாக உடன் வந்த நண்ப சதானந்தன் தெரிவித்தார்.வழி நெடுகிலும் வானரங்கள்.ஆங்காங்கே அவைகளுக்கு பிளாஸ்டிக் டப் பில் உணவு.யார் கொண்டுவைக்கிறார்கள்? கீழே யிருந்து ஓட்டல் காரர்கள், மற்றும் ஓங்காரக்குடில் , போன்ற இடங்களிள் இருந்து தினமும் கொண்டு வந்து வைப்பதாகச் சொன்னார்.இதனால் தான் குரங்குகள் ஊருக்குள் வருவதில்லை எனவும் தெரிவித்தார்.
           மலைமேல் கோவில்.பெருமாள் கிழக்கு நோக்கி இரு நாயகிகளுடனும் சேவை சாதிக்கிறார். தாயாருக்கு ( அலமேலுமங்கா) தனி சன்னதி.தாயார் வடக்கு நோக்கி எழுந்தருளியுள்ளார்.அற்புதமான கட்டமைப்பு.நாயக்கர் கால கட்டடக்கலை மிளிர்கிறது.சிங்கத்தின் முகம் அதன் வாயின் உள்ளே சுழலும் கல் உருண்டை, வெவ்வேறு ஓசை எழுப்பும் ஒரே கல்லில் செதுக்கப்பட்ட நான்கு தூண்கள் என நாயக்கர் கால டச் தெரிகிறது.
      ஆனால், கோவில் பட்டர் கரிகால் சோழன் கட்டியதாக சொல்கிறார்.கரிகால் சோழன் காலமும் நாயக்கர் காலமும் வெவ்வேறானவை.ஒருவேளை சோழர்கால கற்றளிகளை நாயக்கமன்னர்கள் விரிவு படுத்தியது போல ஏதேனும் நிகழ்ந்திருக்கலாம்...எனினும் கரிகால் சோழன்...டூ மச்.
திருப்பதிக்குச் செலுத்த வேண்டிய நேர்த்திக் கடனை இங்கு செலுத்தலாம் என்றும் இங்கு பிரார்த்தனை செய்துகொண்டு திருப்பதியில் செலுத்த முடியாது எனவும் பட்டர் கூறினார்.
குறிப்பிட வேண்டிய விஷயம் தாயார் சன்னதிக்கு அருகில் பெருமாள் பாதம் எனும் ஓர் இடம் உள்ளது. அங்கு பெரிய அளவிலான பாத உருவம் உலோகத்தால் வைக்கப்பட்டுள்ளது.அதன் அருகில் ஒரு சிறு அறை போன்ற தொரு தடுப்பு. அங்கு கருப்புசாமி என போர்டு உள்ளது.உள்ளே வெண்கலத்தால் (பித்தளையா?) ஆன மூன்று குதிரைகள், சிறிய ஜான் உயரச் சிலைகள் .ஒன்றில் ஓர் மனிதன் அடுத்தது தனியாக.இவர்தான் கரிகால் சேழன் எனவும் அவன் அருகில் உள்ளது இளைப்பாறும் குதிரை எனவும் பட்டர் சொன்னார் ஒருமுறை கரிகால் சோழன் வேட்டைக்கு வரும்போது இந்த இடத்தில் ஒரு மரத்தடியில் (மரம் செப்பினால் வேயப்பட்டுள்ளது) பெருமாள் பிரச்ச்னமானதாகக் கூறுகிறார்..மேலே உள்ள பெயர்ப்பலகைக்கும் சொல்வதற்கும் தொடர்பு இல்லை.அந்த இடத்தில் சாம்பிராணி புகை போடும் ஒரு சட்டி. வரம் வேண்டுபவர்கள் மூன்று முறை சாம்பிராணியை புகையும் தணல் சட்டியில் போட்டு பிரார்த்தித்துக் கொண்டால் கைமேல் பலனாம்.நமக்குத்தான் நிறைய லிஸ்ட் இருக்கிறதே...நானும் மூன்று முறை சாம்பிராணி போட்டு வேண்டிக் கொண்டேன்.இந்த சாம்பிராணி சாம்பலை விபூதியாக வழங்குகிறார்கள்.
இந்த மலையை பற்றிய ஒரு சுவாரசியமான தகவலைக் கேள்விப்பட்டிருக்கிறேன்.மலையடிவாரத்தில் வயல்களுக்கு இடையே பச்சாயி வீரய்யா கோவில் ஒன்று உள்ளது.பெருமாள் மீது உள்ள அதீத பத்தியால் 17ஆம் நூற்றாண்டில் வாழ்ந்த வீரய்யா என்ற விவசாயி நிறைமாத கர்ப்பிணியுடன் மலைமேல் சென்று பெருமாளை நித்தம் வழிபடும் வழக்கம் கொண்டவர்.ஒரு முறை அவ்வாறு செல்லும்போது பச்சாயி நெற்றியில் இட்டுக் கொள்ளும் திருமண் (நாமகட்டி) எடுத்துவராமல் வந்ததற்கு கோபமான வீரய்யா அங்கிருந்த மண் உருண்டையை எடுத்து மனைவிமேல் எறிய அவள் அங்கேயே உயிர் துறந்தாளாம்., மனம் வருந்திய வீரய்யா தானும் இறந்து போனாராம்,அவர்கள் சிறு  தெய்வமாக இப்போதும் கோயில் கொண்டுள்ளனர் அடிவாரத்தில்.ஆனால் நான் போன நேரம் அந்தக் கோயில் உள் போக எனக்கு வாய்ப்பு இல்லை.இந்தக் கதை கணவன் மனைவி இடையே கோவம் குறுக்கிடக்கூடாது என்பதை உணர்த்துவதாகப் படுகிறது.இது செவிவழிச் செய்தியாக இங்கு உலவுகிறது.பச்சாயி இந்தக் கோவிலில் கையில் குழந்தையுடன் இருப்பதாகச் சொல்லப்படுகிறது. அடுத்தமுறை சதா வுடன் இந்தக் கோயிலுக்குப் போய்வரவேண்டும்.

நார்த்தாமலை பயணம் 2

அங்கிருந்து இறங்கி மலைக்கோயிலை நோக்கி நடக்கத் துவங்கினோம்.

மஸ்தான் தர்காவிலிருந்து மலைக்கோவில் கொஞ்ச தூரம் தான்.இரு மலைகளுக்கிடையேயான நீர் வழ்ந்தோடிய சுவடுகள் தெரிந்தது.மழைபெய்யும்போது அதி வேகத்துடன் நீர் இந்த வழியாக வழிந்தோடும்.அவ்வளவு சரிவு.ஒரு மழைக்காலத்தில் இங்கு வரவேண்டும்.சோ வென்று மழை பொழியும் போது இந்த மஸ்தான் தர்காவிலிருந்து மழையை அனுபவிக்க வெண்டும் என தோன்றியது.

சிறிது தூரம் சரிவான பெரும் பாறையில் ஏறிச் சென்றவுடன் சமதளத்தை அடைகிறது.அங்கு புதரான பகுதிகளுக்கிடையே ஒற்ரையடிப்பாதை செல்கிறது.அதைபிடித்தபடியே சென்றால் சட்டென கண்முன் அழகாய் தோன்றி நிற்கிறது விஜயாலய சோழீஸ்வரம் கோவில்.மஞ்சள் நிற கற்களால் கட்டப்பட்ட கோவில்.தஞ்சை,கங்கைகொண்ட சோழபுரம் ஆகிய கோவில்களில் உள்ளது போல பழுப்பேறிய மஞ்சள் நிற கற்கள். தஞ்சை கோவிலுக்கு இங்கிருந்து தான் கற்கள் சென்றதாக கூறுகிறார்கள்.இங்கிருந்து 60 கி.மீ. தஞ்சை.குறுக்கே ஆறுகள் இல்லை.மலைகள் இல்லை.கற்களை நிறத்தை வைத்துப் பார்க்கும் போது இருக்கலாம் என்றுதான் தோன்றுகிறது.

           கட்டுமானம் நன்கு சிதிலம் அடைந்து யாரோ மீண்டும் அடுக்கி வைத்த மாதிரி இருக்கிறது.கலைத்துப்போட்ட சீடுக்கட்டு மனதில் வந்து போனது.இன்னும் சீர்படுத்தப்படாத கற்கள் தூண்கள் ஆங்காங்கே கிடக்கிறது.கோவிலைச் சுற்றி ஆறு மண்டபங்கள்.அனைத்தும் சிதிலத்தின் மிச்சம்.ஒரு வாழ்வு,வரலாறு,கலைந்து கிடப்பது போல தோன்றியது.

ஒரு கல்வெட்டில் இப்படி குறித்துள்ளார்கள்

{"ஸவஸ்தி ஸ்ரீ சாத்தம் பூதியான

இளங்கோவதி அரையன் ௭டுப்பித்த கற்றளி

மழை இடித்தழிய மல்லன் விதுமன்

ஆயின தென்னவன் தமிழதிரையன் புதுக்கு"

இக்கோவில் சாத்தம்பூதி என்ற இளங்கோவதி 

முத்தரையனால்எழுப்பபட்டது எனவும்,மழையால் அழிந்துபட்டு போக, மல்லன்  

விதும்பன் என்னும் 

தென்னவன் தமிழதிரையன் , இந்த கற்றளியைபுதுப்பித்தான் என்றும் 

குறிப்பிட்டுள்ளது.} நன்றி: http://myhistoryuntold.blogspot.in/2013/10/blog-post_19.html

அப்படி எனில் மழைக்காலங்களில் இங்கு நீர்பெறுக்கெடுத்து ஓடி இக்கோவில் கட்டுமானங்களை அவ்வப்போது கலைத்துவிடும் எனத் தெரிகிறது.

            ஆச்சரியமான விஷயம் என்னவென்றால் அங்கு குப்பை கூளங்கள் இல்லை, பிளாஸ்டிக் ,பாட்டில்,இத்யாதிகள் இல்லை,பெருக்கி வைத்த மாதிரி சுத்தமாக இருக்கிறது வளாகம்.புல்வெளி நன்கு பராமரிக்கப் படுகிறது.

விமானங்கள் அறைகுறையாய் இருக்கிறது.உள்ளே சாமிசிலைகள் ஏதும் இல்லை,பிரதானக் கோலிலிலே மடடும் பெரிய சிவலிங்கம் உள்ளது.யாரும் இதற்கு பூசைகள் செய்வதாய் தெரியவில்லை.இங்கு யாரேனும் கண்ணப்பர் வந்தால் தான் உண்டு.நான் சென்ற சமயம் அங்கு எங்களைத்தவிர வேறு யாறும் இல்லை.தனிமை ஒரு அமானுஷ்யத்தை ஏற்படுத்தியது.

  கோவில் மேற்கு பார்த்து இருக்கிறது.

கோவிலுக்கு நேர் எதிரே நந்தி சிலை நாலு கால் தூண் மேடையில் அழகாய் இருக்கிறது.எனக்கு எப்போதும் நந்தி சிலைகள் மேல் ஆசை அதிகம்.ஒவ்வொரு நந்தியும் ஒவ்வொருவிதமான அழகுடன் இருக்கிறது.எங்கள் ஊர் விருத்த கிரீஸ்வரர் முன் மண்டப பெரிய நந்தி,மூலவருக்கு எதிரே இருக்கும் சிறியநந்தி,பிரமாண்டமான பிரகதீஸ்வரர் நந்தி, கங்கை கொண்ட சோழபுரம் மஞ்சள் நிற நந்தி என ஒவ்வொன்றும் ஒவ்வொரு அழகுடன் இருக்கிறது.

மதில் வழியாக கோவிலுக்குள் நுழையும் வழி கிழக்கு பார்த்து உள்ளது.மதில்,வாயில் எல்லாம் உதிரியாய் சிதறி இருக்கிறது.

இது ஓரளவிற்கு செப்பனிட்ட நிலை, பல இடங்களில் இக்கால கைங்கர்யங்கள் சிமெண்ட் பூசி மேற்கொள்ளப்படுள்ளது. குறிப்பாக மையமாக உள்ள கோவிலின் விமானம் முழுக்க முழுக்க ரீமேக்.சிமெண்ட் பூசி மொழுகி உள்ளார்கள்.விமானத்தின் மேல் கலசம் போல் ஒரு கல் வைத்திருக்கிறார்கள்.அதுவும் ஒட்ட வைத்தது போல் இருக்கிறது.

கோவிலுக்கு நேர் எதிரே அடிபாகம் உள்ளடங்கி மேல்பாகம் நீட்டிய ஒரு பெரிய பாறையில் நீள் வாக்கில் செவ்வக அளவில் ஒரு குடைவறை.சமணர்களுடையது என பார்த்த வுடன் சொல்லிவிடலாம்.திருச்சி,திருவெள்ளரை,அரகண்டநல்லூர்,ஆகிய இடங்களில் உள்ளது போன்ற அமைப்பு.இதன் உள்ளே கருவறை காலியாக உள்ளது.வெளி மண்டபத்தில் ஒரே அளவிலான விஷ்ணு சிலைகள் கிழக்கு பார்த்து 10 வடக்கு பார்த்து 1 தெற்கு பார்த்து 1 என 12 சிலைகள் உள்ளது.அனைத்தும் புடைப்புச் சிற்பங்கள்.இதனை சமணக் குடகு என்றும் பதினெண்பூமி விண்ணகரம் என்றும் அழைக்கிறார்கள்.இதன் வெளிப்புறம் ஒரு மண்டபம் இருந்ததற்கான பீடம் இருக்கிஆது.அதில் சுற்றி சிறிய அளவில் தொடராக யானை யாளி என சிற்பங்கள் செதுக்கப்பட்டுள்ளன.வியக்கத்தக்க வகையில் எகிப்திய பாணி சிற்பமான  ஸ்பிங்கஸ் காணப்படுகிறது. காமதேனு வகையில் இருந்தாலும் சிங்கங்களுக்கு இடையே எப்படி பசு? பெண்சிங்கம் என்பதற்கான அடையாளமா?ஆய்வுக்குள்ளாக்கப்பட வேண்டிய விஷயம்.

ஆளாளுக்கு ஒரு பெயர் வைத்துக் கொள்வதென்பது எக்காலத்திலும் இருந்திருக்கிறது.7ம் நூற்றாண்டில் சமண குகையாக இருந்தது பின்னர் வைணவக் கோவிலாக மாற்றப் பட்டிருக்கலாம் என விக்கிபீடியாவில் குறிப்பிடப்பட்டுள்ளது.இதை யார் கட்டினார்கள் என்பதற்கான கல்வெட்டு ஏதும் இல்லை.

      இதன் அருகே ஒரு சிறிய அளவிலான குடைவறைக் கோவில் அதில் ஒரு சிவலிங்கம் உள்ளது . இந்த குடைவரைக்குத்தான் பழியிலீச்வரம் என பெயர்.

கல்வெட்டு-855-896

விடேல்விடுகு முத்தரையன் மகன் சாத்தாம் பழீயிலிஇக்கோவிலை கட்டுவித்தான்.இக்கோவின் முன்பு முகமண்டபம்,நந்தி மண்டபம் ,பலிபீடம் ,ஆகியவற்றைகட்டுவித்தான்.பழியிலி சிறிய நங்கை பராமரிக்க கொடையளித்தாள் என்று கூறுகிறது.

நன்றிLhttp://myhistoryuntold.blogspot.in/2013/10/blog-post_19.html)

ஒன்று மட்டும் தெரிகிறது .அவரவர் காலங்களில் என்னென்ன இறைக்கொள்கைகளை ஆள்பவர்கள் பின்பற்றினார்களோ அதன் பதிவுகளாக நார்த்தாமலையும், கோவில்களும் இருக்கிறது.சமணன் கட்டினானா  அதை மாற்றி விஷ்ணுவை வை.அடுத்த ஒருவன் விஷ்ணுவுக்கு மட்டுமா நாம் சிவனுக்கு குடைவோம் என போட்டி போட்டு வரலாறுகளை கல்லில் பதிவு செய்திருக்கின்றனர்.இதில் ஆச்சரியம் என்ன வெனில் இந்த காலத்திலேயே இவ்வளவு சிரமப் பட்டு போக வேண்டிய இந்த இடத்தை அந்த காலத்தில் ஏன் தேர்ந்தெடுத்தார்கள் எப்படி குடைந்தார்கள் என்பது தான்.”வரலாறு முக்கியம் அமைச்சரே”- என வடிவேல் படத்தில் சொல்வது மாதிரி ஒவ்வொரு கலத்திலும் ஒரு இரண்டாம் புலிகேசிகள் இருந்துள்ளனர்.

இந்த இடத்தை தாண்டி கொஞ்சம் பாறை மேல் ஏறினால் ஒரு சிறிய சுனை அதில் அல்லி மலர்கள் இருக்கிறது.

 அங்கிருந்து பாறாஇ மீது சற்று ஏறுவோமேயானால் கோவிலை மேலிருந்து கழுகுப்பார்வையில் பார்க்கும் வய்ப்பு கிடைக்கிறது.அற்புதமான காட்சி.

அங்கிருந்து சரிவாக இறங்கினால் ஒரு செங்கல் கட்டிடம் நகரத்தார் கலைப்பாணி.அது ஒரு பிள்ளையார் கோவில்.கோவில் என்பதற்கான எந்த அடையாளமும் ( பிள்ளையார் தவிர) அங்கு இல்லை.

 ஒரு காலத்தில் காவல் காப்பவர்கள் இருக்கும் இடமாக இருந்திருக்க வேண்டும்.பின்னர் பிள்ளையாரை கொண்டு வந்து பிரதிஷ்டை செய்திருக்க வேண்டும்.அல்லது இஸ்லாமியர்களின் இடமாக இருந்திருக்க வேண்டும்.கட்டிடத்தின் மேல் வளைவுகள் இஸ்லாமிய கலை வடிவத்தில் தான் இருக்கிறது.அந்தக் கோவிலின் பின்புறம் ஒரு சுனை.நாரதர் குளம் என்கிறார்கள்.இதன் உள்ளே ஒரு சிவலிங்கம் உள்ளதாகவும் நீர்வற்றும் போது அது வெளியே தெரியும் எனவும் சொல்கிறார்கள்.அப்போது லிங்கத்தின் மீது விபூதி பட்டை பூசுவார்களாம்.அது அடுத்த முறை நீரில் மூழ்கி வெளியில் வரும் போது அப்படியே இருக்குமாம்,

அங்கிருந்து பார்த்தால் தூரத்தில் கடம்பர் மலை தெரிகிறது.அதன் கீழ்தான் ராஜராஜன் காலத்து சிவன் கோவிலும் கல்வெட்டுக்களும் உள்ளன. ஊருக்குள் நுழையும் போதே அக்கோவில் வலது புறம் மலையடிவாரத்தில் உள்ளது. முதலில் அங்கு செல்வதைவிட தூரத்தில் இருப்பதுவும், ஏற சிரமமாக இருப்பதுவுமான மேல மலைக்கு சென்று விட்டு பிறகு கடம்பர் மலை செல்வது தான் சௌகரியமானது.அடுத்து கடம்பர் மலை .

நார்த்தாமலை பயணம் 1

நார்த்தாமலை இந்தப் பெயரே எனக்கு எப்போதும் ஓர் ஆர்வத்தை ஏற்படுத்தி வந்திருக்கிறது.எனது மூதாதயர்களில் ஒருவரான மகாதேவிஸ்வாமிகள் இந்த ஊருக்கு வந்து தான் தவம் செய்து சன்னியாசம் பெற்றார் என செவி வழிச் செய்தி ஒன்று உண்டு.
             நார்த்தாமலை என்பது ஒரு சிறிய ஊர்.திருச்சி யிலிருந்து புதுக்கோட்டை செல்லும் சாலையில் கீரனூர் தாண்டியதும் சிறிது தூரத்திலேயே சாலையின் வலப்புறம் உயர்ந்த குன்றுகள் தெரியத்துவங்கும்.அவைகள் நார்த்தாமலைக் குன்றுகள் தான்.துடையூர் என்ற கைக்காட்டி சாலை மேல் இடதுபுறம் இருக்கும் அதற்கு எதிரே சாலைக்கு வலப்புறம் ஒரு ஆர்ச் இருக்கும் அதனுள் சென்றால் நார்த்தாமலை.ஆனால் சாலையின் மீது நார்த்தாமலை என்பதான எந்த அறிவிப்புப் பலகையும் இல்லாதது ஆச்சரியம்.வலப்புறமாகத்திரும்பி ஆர்ச் உள் நுழைந்தால் தார்ச்சாலையின் இருபுறமும் விழுதுகள் தவழும் ஆலமரங்களுக்கு இடையே குண்டும் குழியுமான தார்ச்சாலைப்பயணம்.
இந்த ஊரில் ஒன்பது குன்றுகள் இருக்கின்றன.

மேல மலை,
கோட்டை மலை,
கடம்பர் மலை, பறையன் மலை,
 உவச்சன் மலை,
ஆளுருட்டி மலை,
பொம்மை மலை,
மண் மலை,
பொன்மலை

இதுபற்றிய விவரமான வரலாற்றுப் பதிவுகளுக்கு இங்கே செல்லவும்.

http://ta.wikipedia.org/wiki/%E0%AE%A8%E0%AE%BE%E0%AE%B0%E0%AF%8D%E0%AE%A4%E0%AF%8D%E0%AE%A4%E0%AE%BE%E0%AE%AE%E0%AE%B2%E0%AF%88

முன்பு ஒருமுறை புதுக்கோட்டை திருகோகர்ணம் கோவிலுக்குச் சென்றுவிட்டு வரும் வழியில் நார்த்தாமலை செல்ல முற்பட்டேன்.அந்திப்பொழுது ஆனதால் மலைக்கு அருகில் செல்லத்தயங்கி திரும்பிவிட்டேன்.எல்லா செயல்களுக்கும் ஏதேனும் ஒரு காலம் நிர்ணயிக்கப்பட்டிருக்கும் போல.எனக்குக் கூட ஒரு சந்தேகம் இருந்தது நம் மூதாதயர் போல ”நார்த்தாமலை சென்றால் எனக்கும் ஒருவேளை ஞானம் பிறந்து துறவரம் எய்திவிடுவேனோ?.” அடை அவியலைக்கூட துறக்க முடியாத எனக்கு ஆசையை துறப்பதெல்லாம் சாத்தியமில்லை.குண்டுமனி அளவுக்குக் கூட குண்டலினி எழும்பாது.பல முறை தியானத்தில் அமர்ந்து கனவு வரும் அளவு தூங்கி விழுந்துள்ளேன்.அதற்கெல்லாம் சிறந்த பயிற்சி வேண்டும்.நமக்காகவே படைக்கப்பட்டது பக்திமார்க்கம் தான்.ஞான மார்க்கத்திற்கு நான் லாயக்கில்லாதவன்.ஆசைகளின் அலைகளில் ஆனந்தக்கூத்தாடுபவன்.

நார்த்தாமலைக்கு போவதற்கு முன் இணையத்தில் இது பற்றிய தொகுப்புகளைப் படிக்க முற்பட்டேன்.ஜெயமோகன்,பத்ரிசேஷாத்ரி,விக்கிபீடியா,வரலாறு.காம்,பொய்ட்ரிஸ்டோன் விஜய், ஆகியவைகளைத்தவிர வேறு உபயோகமுள்ள தகவல்கள் கிடைக்கவில்லை.மற்ற தெல்லாம் காப்பி பேஸ்ட் வகையறா.எஸ்.ராமகிருஷ்ணன் நார்த்தாமலையை பற்றி எழுதியுள்ளாரா? சமீபத்தில் வெளிவ்ந்த இலக்கற்றபயணி வரையில் இல்லை என்றே நினைக்கிறேன்.நாம் பார்த்து வந்த இடத்தைப்பற்றி எஸ்.ரா.எழுதியதை படிக்கும் போது ஏற்படும் ஆதங்கம் அதிகம்.”அட நாம கூட போனோமே இதுமாதிரி பார்க்கத் தோன்றவில்லையே” என்றிருக்கும்.

                                                  நேர்வழியில் செல்லும் சாலை ஓரிடத்தில் வலப்புறம் முட்டி திரும்பும்.அந்த இடத்திற்கு எதிரே ஒரு சிறிய கான்கிரீட் சாலை சாலையை ஒட்டி இருபுறமும் வீடுகள் பாத்திரம் கழுவுதல், குழந்தையை குளிப்பாட்டுதல்,ஆட்டை கட்டிவைத்தல், என்பதான அனைத்தும் இந்தச் சாலையில் தான் மக்கள் செய்கிறார்கள்.பார்த்துச் செல்ல வேண்டும்.நான்கு சக்கர வாகனம் என்றால் ரொம்ப ஜாக்கிரதை வேண்டும்.அதன்வழியே ஊர்ந்து சென்றால் முடிவில் கான்கிரீட் சாலை முடிவடையும் அங்கிருந்து இரண்டு மண் ஒற்றையடிப் பாதைகள் மேற்காகவும்,தெற்காகவும் பிரியும்,

                                மேற்காக பிரியும் வழி யில் நடந்துதான் செல்ல வேண்டும். ஒரு பெரிய குளக்கரையில் கொண்டுபோய் சேர்க்கும்.குளத்திற்கு அந்தப்புறம் பெரும்பாறையாய் இருப்பது தான் மேலமலை.இதன் வடபகுதி மீது ஏறி சுமார் 2.5 கி.மீ நடந்து சென்றால் சமணக்குடகு,பழியிலீச்வரம்,  விசயாலய சோழிசுவரம்,ஆகிய வரலாற்று முக்கியத்துவம் பெற்ற இடங்கள் உள்ளன.
                                         இன்னொரு வழியான தெற்குபக்கம் செல்லும் மண்பாதையில் சென்றால் சுமார் 1.00 வரையில் வாகனத்தில் செல்லலாம்.திகிலூட்டும் காட்டுப்பாதை.அதுவும் 1.00 கி.மீ ல் ஒரிடத்தில் முடியும்.அங்கேயே வாகனத்தை நிறுத்திவிட்டு நடைபயணம் தொடங்க வெண்டும்.அங்கிருந்து 1.00 கி.மீ.இருமலைகளுக்கிடையேயான மலைச்சரிவில் நடந்தால் மேற்சொன்ன பகுதிக்குச் செல்லலாம்.

                   போகும் வழியிலேயே இடதுபுறம் சற்று உயரமான குன்றிற்கு படிக்கட்டுச் செல்லும் .இதுதான் ”ஹஸ்ரத் மஸ்தான் தர்கா” மஸ்தான் என்பவர் ஓர் இஸ்லாமிய இறைத்தூதராக 400 வருடங்களுக்கு முன் இங்கு வாழ்ந்துள்ளார்.இங்குள்ள மூலிகைகளை கொண்டு சில வைத்தியங்களையும் செய்துள்ளார்.இந்த தர்க்காவிற்கு மேல்பகுதியில் உள்ள குகைப்போன்ற பகுதியில் தான் இவர் சித்தி அடந்ததாக கூறுகின்றனர்.இப்போதும் பவுர்ணமி தினத்து இரவில் இங்கு சிறப்பு பிரார்த்தனை/தொழுகை நடைபெறுகிறது.இவர் ஒருமுறை இங்கு தொழுகை நடத்திக் கொண்டிருந்தபோது குறுக்கே வந்த பாம்பு இவருக்கு இடயூறு செய்யக்கூடாது என கல்லாகிவிட்டதாம்.அதன் அடையாளங்களை கீழேபாறையில் காண்பிக்கிறார்கள்.அது ஃபாசில் மாதிரி இருக்கிறது.

                                ஒரு பெரிய பாறயின் கீழ் சற்று சிறிய பாறை தாங்கிக் கொண்டுள்ளது அதன் அடியில் குகை உள்ளது.உள்ளே தர்க்காவில் உள்ளது போல பட்டுப்போர்வை போற்றிய மேடு.விளக்கு ஏர்றுகிறார்கள்.ஊதுவர்த்தி ஏற்றுகிறார்கள்.அந்த இடத்தில் சிமெண்ட் தரைபோடப்பட்டு அமரும்போது சிலென்று இருக்கிறது.நாங்கல் சென்றபோது ”அப்துல்ரஹ்மான்” என்பவர் அங்கிருந்தார்.அவர்தான் ”துவா” ஓதினார்.அரபியாக இருந்தாலும் அவர் சொல்லும் தருணம் கண்களைமூடிக்கொண்டு அந்த குகையில் அமர்ந்திருக்கும் போது இனம் புரியாத அமைதி ஏற்படுகிறது.

                 கண்ணை மூடிக்கொண்டபோது பாபா நினைவுக்கு வந்தார்.மகாதேவி ஸ்வாமிகள் இங்கு இந்த தர்காவிற்கு வந்திருப்பாரோ? வந்திருந்தால் இங்குதான் அமர்ந்திருப்பார்.காலங்கள் கடந்து மனம் பிரயாணித்தது.ஆன்மீக நாட்டம் உள்ளதால் தானே ரமணரை அண்ணாமலை அழைத்தது.அதுபோல சித்தர்களும் யோகிகளும் ஏதோ ஒரு சக்தி இருப்பதால் தான் இங்கு வந்திருக்க வேண்டும்.இவ்வளவு தூரம் கடந்து மகாதேவிஸ்வாமிகள் ஏன் இங்கு வரவேண்டும்?இந்த மஸ்தான் ஏன் இங்கேயே வாழ்ந்தார்? நான் ஏன் இங்கு இன்று இந்த இடத்தில் அமர்ந்து இதையெல்லாம் நினைத்துக்கொள்ள வேண்டும். பழங்கால கோயிலைப் பார்க்க வந்தவன் இப்படி ஒரு தர்காவில் ஏன் அமர்ந்திருக்க வேண்டும்.
                                அரபியிலிருந்து தமிழுக்கு மாறினார் அப்துல்ரஹ்மான்.அற்புத மான வார்த்தைகளால் வாழ்த்தி,பிரார்த்தனை செய்தார்.சுனைத்தண்ணீர் புனிதம் என ஒரு பாட்டிலில் இருந்து கொடுத்தார்.கொஞ்சம் சந்தனம் கொடுத்தார்.மயிலிறகால் முகத்தில் வருடி அரபியில் ஏதோ சொன்னர்.போர்வை போற்றிய மேட்டின் மேல் தலை வைத்து வேண்டிக் கொள்ளச் சொன்னர்.

                                 மஸ்தான் அப்பா அழைக்காமல் இங்கு நீங்கள் வரமுடியாது என்றார்.அப்பா என்றவுடன் அப்பா ஞாபகம்.அப்பாவுடன் இந்த மலையில் ஏறுவது போன்ற பிம்பம் மனதுள் வந்துபோனது.வெளியே வ்ந்ததும் 400 வருஷமாக இருக்கும் ஒரு மரத்தை காட்டினார்.சின்ன மரமாக இருந்தது.குழந்தை பாக்கியம் இல்லாதவர்கள் இங்கு தூளி கட்டுவார்களாம்.பவுர்ணமி அன்று மஸ்தான் சித்தி அடைந்த இடமான குகைக்கு படுத்தவாறே ஊர்ந்து செல்லும் பாதையில் செல்லலாம் எனவும்,.சில சமயம் இன்னும் வெள்ளைப்பாம்பு இங்கு வ்ந்து போவதாகவும் கூறினார்.கேட்கும் போதே திரில்லிங்காக இருந்தது.அப்துல் ரக்ஹ்மானிடம் விடைபெற்றுக் கொண்டு கிளம்பினோம்.

                              சிவன் கோவிலைப்பற்றியும்,ஊர்பெயர்பற்றியும்,கோவிலுக்கு பிபுறமுள்ள சுனையில் சிவலிங்கம் முழுகியுள்ளது எனவும் நீர்வற்றும் போது அதன் நெற்றியில் இருக்கும் விபூதிபட்டை கலைவதில்லை எனவும் பலதகவல்களை சொன்னர்.

ஊர் பெயர் காரணம்

நாரதர் மலைதான் நார்த்தாமலை என மருவியது என சொல்கிறார்கள்.இன்னும் சில வலைத்தலங்களில் அனுமன் சஞ்சீவி மலையை எடுத்துச் சென்றபோது கீழே விழுந்தது தான் இந்த ஒன்பது குன்றுகளும் என்று சொல்கிறார்கள்.”நார்த்தங்காய் மரம் நிறைய இருந்ததால் இந்தபெயர் வந்தது என யாரும் சொல்ல வில்லை.”
சில கோவில்களில்  அனுமன் சிலையில் சஞ்சீவி மலையை கையில் அடுக்கி வைத்த லட்டுமாதிரி சிற்பிகள் செதுக்கி யிருப்பார்கள்.அதில் ஒன்பது லட்டு விழுந்துவிட்டதோ என்னவோ?
வணிகர்கள் இருந்த நகரம் என்பதால் நகரத்தார் மலை எனவும் பெயர் காரணம் கூறுகின்றனர்.
அங்கிருந்து இறங்கி மலைக்கோயிலை நோக்கி நடக்கத் துவங்கினோம்.

இன்னும் தொடருவோம்.